Ën la biblioutècco dâ patouà dë l'Eicolo Latino dâ Poumaré un po troubâ tuti lh'eicrît dë Arturo Genre e Teofilo G. Pons, tuti dui ouriginari dë la Val San Martin.
Teofilo G. Pons (1895 – 1991), naisù a Masèel, ën val San Martin, al à coumbatù ënt â corp dë lh'Alpin ën la Grando guèro; al à fait sî eituddi univërsitari a Napplo e Milan e outëngù la laouréo a l'Academìo Shientificco dë Brera ënt â 1923. Al à dedià sa vitto a moutrâ lëttra e al ê îtà preside dâ Liceo Vôdouà dë la Tour, fin a la pansioun, ënt â 1962.
Al à coulabourà reguliermënt â Bollettino dë la Souchetà d'Eituddi Vôdouà, â Pellice e a l'Eco delle Valli Valdesi, e a s'ê sourtout ëntërësà a la coulturo poupularo e lâ tradisoun dë la valadda alpina (ditoun, vitto poupularo, coûtumma, patouà, ecc.) ënsëmp a l' ëstorio dî vôdouà ëntër lî siecle XVI e XVII.
(nouvella tirâ da: Teofilo G. Pons, Arturo Genre, Dizionario del dialetto occitano della Val Germanasca, Edizioni dell'Orso, 1997)
Ëntër sî eicrît lî pi counouisù nouz an Vita montanara e folklore nelle Valli valdesi (1978) e Vita montanara e tradizioni popolari alpine (1979), e lou Dizionario del dialetto valdese della Val Germanasca (1973), ërpilhà e ënrichì da Arturo Genre.
Ën la biblioutècco la i à pi dë sincsënt eicrît dë Teofilo Pons: bién î soun îtà publià sû dî journâl dâ post, a partî dâ 1925, coum l'Eco delle Valli Valdesi e Il Pellice, e dëcò sû dâ Bollettino dë la Souchetà d'Eituddi Vôdouà, dount un nën parlo souvënt.